भोजपुर । जिल्लामा दैनिकरूपमा कोरोना संक्रमण दर बढन थाले पछि भोजपुर नगरपालिकाले नगर क्षेत्रमा कोरोना परिक्षण गराउन थालेको छ । नगरपालिकाले १२ वटा वडामा नगरपालिकाले एन्टिजेन्ट किट मार्फत निशुल्क कोरोना परिक्षण शुरू गरेको हो । जस अन्तर्गत वडा नम्बर ७, ८ र १२ मा गरि ७५ जनाको कोरोना परिक्षण भै सकेको नगरपालिकाको स्वास्थ्य शाखा प्रमुख बिरेन्द्र दासले बताउनु भयो । भोजपुर नगरपालिका वडा ७ बजार क्षेत्रमा ५७ जनाको कोरोना परिक्षण परिक्षण गर्दा १ जनाको रिपोर्ट पोजेटिभ आएको छ । यस्तै नगरपालिकाको वडा नम्वर १२ टक्सार र वडा नम्वर ८ पोखरेका १८ जनाको परिक्षण गर्दा ५ जनाको रिर्पोट पोजेटिभ आएको थियो । संक्रमण पुष्टि भएका उनीहरुकोे स्वास्थ्य अवस्था सामान्य छ ।
उनीहरुको एन्टिजेन्ट किट परिक्षण विधिद्वारा कोरोना परिक्षण गरेको हो ।
कोरोनाको जोखिममा रहेका स्थानीयहरुलाई आफ्नो स्वास्थ्य अवस्था थाहा पाउन नगरपालिकाले शुरु गरेको परिक्षणको काम समय अनुकुल उदारणीय भएको स्थानिय सीता कार्कीले बताउनुभयो । भोजपुर नगरपालिकाले नगरवासीहरुका लागि कोरोना संक्रमणबाट बच्न तथा उपचारका लागि आवश्यक पर्ने सहयोग समेत गरिने जनाएको छ ।
जिल्लामा पछिल्लो समय कोरोना संक्रमितको संख्या बढेसँगै नगरवासीहरुको स्वास्थ्य सुनिश्चितताका लागि नगरपालिकाले निशुल्क कोरोना परिक्षण शुरू गरेको भोजपुर नगरपालिकाका मेयर कैलाश कुमार आलेले बताउनुभयो । भोजपुर जिल्लामा आइतवारको तथ्यांक अनुसार संक्रमित संख्या ३ सय २० पुगेको छ भने भोजपुर नगरपालिका मात्र ४८ जना कोरोना संक्रमित छन ।
